TLU SA versoek vestiging van ‘n advieskomitee vir primêre produsente
TLU SA het vandag met die Direkteur-Generaal van die Departement van Landbou, Mooketsa Ramasodi ontmoet en die geleentheid gebruik om ernstige probleme in die landboubedryf aan te spreek. Die gesprek was positief en konstruktief.
Bennie van Zyl, hoofbestuurder van TLU SA het sy kommer uitgespreek oor die toepassing en implementering van beleid ten opsigte van voedselsekerheid in Suid-Afrika. Verskeie besluite, voorstelle en beleide, asook die nie-toepassing en agteruitgang van kardinale landboudienste soos die Landbounavorsingsraad, veeartsenykunde en ondersteuning aan boere tydens rampe deur die Departement van Landbou veroorsaak groot onsekerheid in die bedryf, breek beleggingsvertroue af en kos die verbruiker al hoe meer.
Die huidige plantseisoen se produksie-insette soos diesel en kunsmis word tans internasionaal deur ‘n verskeidenheid aspekte beïnvloed, wat ‘n negatiewe gevolg op volhoubare voedselproduksie in Suid-Afrika gaan hê. “Ons landbou-omgewing kan nie bekostig om enige verdere foutiewe beleidsrigtings te implementeer en onnodig geld te vermors nie,” sê Van Zyl. Verdere kommer heers oor die mentorskap aan opkomende boere wat misluk as gevolg van onvoldoende kennis en wat slegs met sukses toegepas kan word met genoeg opgeleide landboukundiges wat as deel van landbou tegniese dienste hierdie opkomende boere moet ondersteun om suksesvolle produsente te word.
TLU SA het voorgestel dat die departement vanuit TLU SA, SAAI, AGRI SA, AFASA en NAFU ‘n advieskomitee van primêre produsente daar moet stel wat net kyk na hul beleidstoepassing en kommentaar kan gee alvorens beleid geïmplementeer word.
Een van die grootste bates wat ‘n land het, naamlik ‘n produserende kommersiële boer, moet effektief en suksesvol kan boer, sonder om voortdurend negatief beïnvloed te word in sy praktyke. Die belangrikheid van ‘n suksesvolle kommersiële landboubedryf kan nie langer deur die Departement van Landbou ontken word nie. Insette vanuit ‘n kundige komitee, bestaande uit die land se grootste landbou-organisasies kan help om te verseker dat die regte besluite geneem word en dat rolspelers vanuit die Departement volledig ingeligte begrip en persepsie van die bedryf het.
Om TLU SA te steun om boere se belange in die land te beskerm, sluit gerus aan as ‘n lid of ondersteuner by hierdie skakel.
