Vanuit die hoofkantoor trag TLU SA om lede asook ander landbouers en plattelandse bewoners te bedien met toepaslike inligting in die vorm van Veiligheidsbulletins waarvan ongeveer 40 reeds versprei is.
Hierdie bulletins ondersteun die Nasionale Landbou Veiligheid Strategie wat vroeg in 2018 op ASUF-vlak aanvaar is en sedertdien jaarliks opgedateer is. Die nuutste weergawe is in besonder belyn met die mees onlangse SAPD Landelike Veiligheid Strategie.
Die ondersteunende Veiligheidsbulletins is grootliks die produkte van persone wat vanuit ‘n praktiese ervaringsveld waardevolle inligting en riglyne beskikbaar stel. Dit is van deurslaggewende belang dat persone wat direk betrokke was of is by die breë spektrum van veiligheidsaangeleenthede, hul toeligting, advies en riglyne soos van toepassing op tipiese landbouverwante veiligheidsaspekte deel met ander wat waarde daaruit kan put.
Vir praktiese doeleindes word gepoog om die Veiligheidsbulletin te beperk tot twee bladsye, maar verdienstelike uitsonderings sal verwelkom word. Insette kan na dienste@tlu.co.za gestuur word en sal met dank erken word.
