Maak 'n bydrae tot TLU SA Traumafonds: Klik hier
Veiligheidstendense Vrydag | 26 Junie | 2020

Met die instelling van die inperkingsregulasies was daar ‘n opmerklike afname in beide plaasaanvalle asook gevolglike moorde. In werklikheid is die voorkoms daarvan bykans gehalveer. Mettertyd het dit egter duidelik geword dat toenemende hongerte, toenemende diefstal van lewende hawe, eetbare produkte asook gereedskap (wat vir kontant verkwansel kon word) tot gevolg gehad het. Om sake te vererger het die Minister van Polisie se onwrikbare beperking op die aktiwiteite van Plaaswagte tot gevolg gehad dat elke landbouer 24 uur per dag, sewe dae per week benewens die normale plaaswerk, ook moes omsien na veiligheid op sy eiendom.

‘n Verontrustende verwikkeling was die opmerklike toename van geweldsmisdade (insluitend etlike moorde en besondere wrede marteling van slagoffers) wat na ongeveer 11 weke begin intree het en steeds voortduur. Op die oog af wil dit voorkom asof hierdie misdade boonop met ‘n sterk dosis rassistiese haat gepaard gaan.

Terwyl dit aanvaar kan word dat mense wat honger ly, tot diefstal van enige iets eetbaar gedryf kan word, is die gepaardgaande stygende vlak van geweldsmisdaad uiters verontrustend. Teen hierdie agtergrond neem die veiligheid van plaasbewoners nuwe afmetings aan. Dit sal gevolglik wys wees dat die reeks praktiese wenke vervat in die Veiligheidsbulletins wat sedert die begin van 2018 op gereelde basis beskikbaar gestel was, opnuut afgestof en kennis van geneem word.

Die nuutste vergelyking tot TLU SA se beskikking vir die 12 weke voor – en 12 weke na inperking, dui op die volgende data:

Voor    :           66 aanvalle en 12 moorde

Na       :           47 aanvalle en 10 moorde