Die 22ste Goliat van Gat Pampoenfees en pampoengroei-kompetisie was ’n reuse sukses en het vanjaar nuwe rekords opgelewer. Hoewel die gesogte 1 ton-pampoen nog nie bereik is nie, is ’n rekordtotaal van 4 342 kg pampoene tydens die kompetisie ingeweeg, die meeste nog ooit by hierdie gewilde fees.
In die ware gees van gemeenskapsdiens word al die pampoene wat by die kompetisie ingeweeg is, geskenk aan welsynsorganisasies in en om Pretoria, waar daar ’n groot behoefte bestaan om minderbevoorregte mense te ondersteun.
Die wenner van die 2026 Goliat van Gat-kompetisie was Wykus Lamprecht van Meyerton, met ’n indrukwekkende pampoen van 653 kg en ’n skorsie van 492,3 kg. Lamprecht het ook uitgestaan met ander inskrywings, waaronder ’n tamatie van 1 kg, ’n waatlemoen van 16,2 kg en ’n murgpampoen van 23,8 kg.
Die naaswenner was Pieter Botha van Pretoria met sy pampoen Poeksie wat 562 kg geweeg het, terwyl Jacky Smal van Sundra die derde plek behaal het met ’n pampoen van 549,4 kg.
Die junior wenner (onder 6 jaar) was Dirkie Smal, met ’n pampoen van 133 kg.
Die Goliat van Gat-kompetisie is amptelik geregistreer by die Great Pumpkin Commonwealth, wat beteken dat dit ’n erkende inweegpunt in Suid-Afrika is. Die wenners en gewigte word saam met resultate van pampoengroei-kompetisies regoor die wêreld op die organisasie se databasis opgeneem.
Ongeveer 2 500 besoekers het die pampoenfees bygewoon, wat vanjaar vir die eerste keer by die Lavender Kontrei Mark aangebied is. Die feestelike atmosfeer is verder versterk deur prettige aktiwiteite soos pitspoeg-kompetisies en pampoenresies, wat groot vermaak vir oud en jonk gebied het.
Die gewilde sanger Pieter Koen se lewendige optrede het ook tot die vrolike atmosfeer bygedra en die dag se vieringe verder opgehelder.
Die pampoengeregte-kompetisie is beoordeel deur kenners van Steyn’s Culinary School in Hatfield, Pretoria, saam met Willie Strauss, en die beoordelaars het groot lof uitgespreek vir die kreatiwiteit en kwaliteit van die disse.
Die wenners van die pampoengeregte-kompetisie was:
- 1ste plek: Nic Neveling | Pampoenbier (Ale)
- 2de plek: AJ Taljaard | Pampoenpiekel
- 3de plek: Mathilda Nel | Pampoentert
Die wenpampoen van 653 kg word tans uitgestal by die Uitkyk Vleismark, waar belangstellendes dit self kan gaan besigtig.
Finale uitslae | Goliat van Gat 2026:
- Wykus Lamprecht (Meyerton) | 653 kg
- Pieter Botha (Pretoria) | 562 kg
- Jacky Smal (Sundra) | 549,4 kg
- Cornelis Bester (Heidelberg) | 452,8 kg
- Dirk Smal (Sundra) | 434,8 kg
- Alida Bester (Heidelberg) | 336,8 kg
- Bester Hattingh (Fochville) | 237,4 kg
- Petrus Mare (Fochville) | 131,4 kg
Die Goliat van Gat Pampoenfees groei jaarliks in gewildheid en wys opnuut hoe landbou, gemeenskapsgees en kreatiwiteit saamkom om ’n unieke en betekenisvolle gebeurtenis te skep.
