TLU SA neem kennis van die ANC se legotla idee van belasting op onbenutte grond – as manier om meer grond vir sy transformasie agenda beskikbaar te kry – maar doen daarmee saam ’n beroep op die ANC om te verduidelik wat hy met onbenutte grond bedoel.
“Verwys die ANC dalk na die grond wat hy ingevolge sy grondoordragprogramme erken 95% het uit produksie gegaan? Wanneer ’n boer in ’n wisselbouprogram bepaalde kampe laat rus, is dit ver verwyder van onbenut en is daar ’n wetenskaplike volhoubaarheid daar ingebou,” verduidelik mnr. Henry Geldenhuys, TLU SA President
“Om grond uit te deel is van geen waarde as dit nie die ander produksiefaktore in ’n bepaalde sinergie in ag neem nie. Grond op sy eie is nie welvaart nie, maar kan indien ’n ondernemer (boer) dit met kundigheid bestuur saam met die ander faktore in ’n dinamiese produksieproses om winsgewend te kan wees het die kans om welvaart te skep.”
Mnr. Geldenhuys voeg by: “Die ANC moet besluit of hy voedselsekerheid in die land wil hê of nie. Met sy beleid is hy besig om ons land se voedselproduksie onder verkeerde soort druk te plaas. Hierdie benadering om grond in die hande te probeer kry, kan hoogstens gesien word as ’n stemwerwery. Deur die jare het TLU SA en ook andere by herhaling ekonomies gerigte voorstelle gemaak oor hoe nuwe toetreders wel kan toetree tot die landbou-omgewing en die kans op sukses kan hê mits hulle natuurlik die verantwoordelikheid wat dit verg om te kan boer sal aanvaar.”
Mnr. Geldenhuys vra verder die vraag oor wat nog verduidelik moet word oor hoe werk die ekonomie en die enigste meganisme wat bepaal of daar ekonomiese sukses is al dan nie, naamlik die markkrag-beginsels.
“Kom ons probeer weer. Die entrepreneur of ondernemer as een van die produksiefaktore is die persoon wat die risiko neem om met sy of haar toepaslike kennis die ander produksiefaktore naamlik grondstowwe, kapitaal en arbeid saam te voeg in ’n besigheid. Met die snelle ontwikkeling van tegnologie en meganisasie sou dit as ’n vyfde produksiefaktor gesien kan word ook in die sin dat dit arbeid kan vervang. Iets wat die vakbonde dalk van moet kennis neem.
“Dit is dalk nodig vir die ANC om te leer hoe om mense te voed met ’n ideologie, want op sy werkswyse van kader-ontplooiing, selfverryking en byna geen ekonomiese uitkomste nie sal dit dalk al wees wat mettertyd gaan oorbly om mense kos te gee,” het mnr. Geldenhuys gewaarsku.
