Klik hier en maak 'n bydrae tot die TLU SA Traumafonds
Maak 'n bydrae tot TLU SA Traumafonds: Klik hier
Boodskap Van Bennie | Desember 2020 Maandag | 14 Desember | 2020

Daar kan met dankbaarheid teruggekyk word na 2020. Inderdaad ‘n unieke jaar wat eiesoortige uitdagings na vore gebring het. In die jaar het TLU SA se ondersteuners gegroei en met almal se bydraes het ons gewis ons stempel afgedruk in die landbou-omgewing.

Hierdie tyd van die jaar word daar gewoonlik bestekopname gedoen oor die jaar wat verby is, maar gewis ook oor die pad vorentoe. Ons gaan nou in ‘n feestyd in waar families saamkuier en stil word rondom ‘n paar belangrike dae wat ons herdenk.

Op 16 Desember is dit Geloftedag. Ons het ‘n verbintenis van ons voorouers om die dag soos ‘n Sabbat deur te bring en erkenning te gee aan God drie-enig vir dit wat by Bloedrivier gebeur het. Mag ons nie die Gelofte vergeet nie. Regdeur die land word daar feeste aangebied en dit is verblydend dat die bywoning daarvan die laaste paar jaar gestyg het.

Ons vier ook as Christene die geboorte van ons Verlosser op 25 Desember. Mag dit vir elkeen vanjaar ‘n ware Christus-fees wees waar ons Sy genade en liefde in oormaat gaan ervaar.

Die nuwe jaar lê vir ons en wink. Dit is nie vir ons beskore om te weet wat 2021 alles gaan inhou nie. Wat ons wel weet is vanwaar ons krag en wysheid om te kan kies en te werk vandaan kom. Mag elkeen baie seën en voorspoed vir 2021 ervaar.

Mag ons ook in die tyd sterk fokus op ons veiligheid en toesien dat ons nie in ‘n onbewaakte oomblik onkant gevang word deur diegene wat vandag as terroriste in die land opereer nie.

TLU SA se kantore sluit op 15 Desember en sal weer op 4 Januarie oopmaak.

Sluit aan

Nuusbriewe
Checkboxes

Kontak Ons