‘…My volk gaan te gronde weens gebrek aan kennis…’ is die eerste gedeelte van Hosea 4:6 en is vir ons almal ‘n baie bekende aanhaling uit die Bybel. Dit is inderdaad so dat wanneer iemand nie weet nie, dan weet hy nie. Dit lei dat iemand dan geen besluit of ‘n swak besluit neem.
In byna elke gesprek wat ons deesdae het, word verwys na die uitdagende tye waarin ons nou leef. Dit is ook heeltemal met reg. Dinge is vandag net anders as waaraan ons nog tot onlangs gewoond was.
Ons landbouers gaan gebuk onder verskeie irrasionele aspekte wat hanteer moet word. Vanaf TLU SA se kant word daar, met groot dank teenoor ons ampsdraers en amptenare, gereeld riglyne uitgereik oor hoe om van hierdie ongemaklike situasies te kan hanteer. Dit is hoe ver ons as ‘n organisasie behulpsaam kan wees om ons lede met die nodige inligting te bedien. Dit is die verantwoordelikheid van ons lede en ondersteuners om dit self toe te pas en ook terugvoer met nuwe voorstelle en aanbevelings te gee. Dit is wat ons sterker maak.
Wyle Dries Joubert het ‘n baie mooi vergelyking getref met ‘n skuifsleutel (shifting spanner) en georganiseerde landbou. Indien jou skuifsleutel in die stoor op die rak lê, beteken dit vir jou niks. Jy moet self die skuifsleutel optel en die nodige verstellings doen om dit te gebruik vir die doel waarvoor jy dit nodig het.
Die krag van georganiseerde landbou lê juis daarin dat dit groter wringkrag kan genereer. Deur ‘n pyp oor die agterkant van die skuifsleutel te trek, bewerkstellig jy meer wringkrag. Meer wringkrag vir ‘n BV, beteken meer wringkrag vir ‘n DLU wat lei tot meer wringkrag vir die totale organisasie. Maar die lang pyp vir wringkrag beteken niks indien die lid aan die voorkant nie die skuifsleutel reg posisioneer en in plek hou nie.
Oor elk van die aspekte is dit die lid self wat moet gaan toepas. Die riglyn is uit oor waardasierolle. Maar indien die lid nie self voortgaan om die riglyn toe te pas nie, moet hy self die gevolge dra wanneer eiendomme se waardasies onaanvaarbaar hoog word.
Ons het al meer as 40 riglyne oor veiligheid in die vorm van ons Bulletins uitgestuur. Dit hang egter van die lid af of die teiken op hulle rug kleiner word, omdat hulle die riglyne toepas.
Dit is verstommend hoe baie boere uit gevestigde strukture beweeg om ‘n nuwe struktuur te begin en die hele wiel van vooraf probeer ontwerp.
Die krag van georganiseerde landbou is gesetel op grondvlak. Dit is daar waar ons ‘n taakverdeling in ‘n gemeenskap stel sodat ons kollektief mekaar se kundigheid kan inspan. Neem die skuifsleutel op en help dat jou buurman ook toegang tot die beste inligting het – saam skep ons dan die nodige wringkrag, kennis en kundigheid.
