TLU SA spreek sy sterkste teenkanting uit teen Eskom se plan om ‘n onregverdige 44% verhoging in elektrisiteitstariewe in te stel, wat beoog word vir April 2025.
Hierdie voorgestelde verhoging is ’n onaanvaarbare las wat verbruikers nie as gevolg van Eskom se jarelange oneffektiewe bestuur en wanbestuur moet dra nie. Voordat enige tariefverhoging oorweeg kan word, moet Eskom eerstens ‘n deeglike hersiening van sy struktuur doen, veral met betrekking tot posvereistes en die effektiwiteit van personeel op alle vlakke.
Die prys wat Suid-Afrika betaal vir kaderontplooiing, wat Eskom en ander semi-staatsinstellings grootliks lamlê, is een van die hoofredes vir hierdie oneffektiwiteit. “Dit is hoogtyd dat Eskom sy huis in orde kry, eerder as om op verbruikers staat te maak om hul mislukkings te finansier,” sê Bennie van Zyl, hoofbestuurder van TLU SA.
Suid-Afrika se ekonomie toon tans geringe tekens van herstel, grootliks as gevolg van dalende brandstofpryse en die afwesigheid van beurtkrag, wat te danke is aan die privaatsektor. ’n Drastiese verhoging in elektrisiteitstariewe sal egter ‘n enorme knou aan besighede se winsgewendheid toedien en die verbetering in die ekonomie vinnig laat verdwyn.
Die landbousektor, wat reeds weens klimatologiese uitdagings en gebrekkige infrastruktuur onder geweldige druk verkeer, sal nog verder swaar trek. ‘n Verhoging van hierdie omvang sal volhoubare voedselproduksie ernstig bedreig.
Die impak op die koste van voedsel en landbouprodukte gaan astronomies wees. Verbruikers sal nie net ‘n hoër elektrisiteitsrekening moet betaal nie, maar ook aansienlik meer vir kos. In ‘n land waar swak ekonomiese toestande en werkloosheid reeds swaar op die publiek druk, sal hierdie verhoging veral diegene wat dit die minste kan bekostig, die hardste tref. Kan Suid-Afrika regtig hierdie las dra?
Daar is ook groeiende bewerings dat ‘n bedrag per liter ingevoerde diesel na die ANC gaan. TLU SA het reeds die minister van Energie en die voormalige minister van Landbou versoek om hierdie kwessie aan te spreek, maar daar is tot dusver geen bevredigende antwoord ontvang nie. “Ons roep Eskom en die regering op om hierdie kwessies eerlik te hanteer en onder eed te verklaar dat geen politieke party finansieel baat by dieselinvoere nie,” sê Van Zyl.
Indien Eskom voortgaan met hierdie voorgestelde verhoging, sal dit net meer verbruikers dwing om hul eie energieoplossings te soek, wat Eskom uiteindelik verder sal verlam. Eskom moet dringend sy eie huis in orde kry, en die verbruiker kan nie aanhou om te betaal vir mislukkings en wanbestuur nie.
