Sowat 550 km se grondpaaie in Noordwes is nou geskraap en meer toeganklik danksy ’n memorandum van verstandhouding wat NWK met dié provinsie se Departement van Openbare Werke en Paaie onderteken het.
Ná ’n geruime tyd se onderhandelinge met die regering het Suid-Afrika se oudste landboumaatskappy uiteindelik die nodige magtiging en vrywaring bekom en dadelik aan die werk gespring.
’n Kontrakteur is aangestel en sowat R500 000 betaal om die betrokke paaie te skraap. Omdat die stroopseisoen onderweg was, is daar besluit om tydens die eerste fase van die projek te fokus op grondpaaie wat na NWK se silokomplekse lei.
Die projek is in samewerking met Agri NW onderneem. Dit het op 1 Junie afgeskop en sowat ses weke geduur.
Paaie is geskraap in die areas van Kameel, Geysdorp, Excelsior, Delareyville, Barberspan, Rostrataville, Sannieshof, Vermaas, Kleinharts, Boschpoort, Coligny, Grootpan, Lusthof en Mareetsane.
“Ons paaie is in ʼn haglike toestand en lei tot groot ongelukkigheid onder ons bevolking. Groot skade word deur elke persoon wat paaie gebruik, gely. As ʼn sake-onderneming het die vervalle paaie NWK al ʼn geruime tyd gelede genoop om ʼn ooreenkoms met die provinsiale regering te sluit sodat iets aan die situasie gedoen kon word,” het Theo Rabe, groephoof-uitvoerende beampte van NWK, verduidelik.
“Al die skade wat gely word, veral deur ons produsente, dra by tot die stygende voedselpryse. Veral die prys van arm gemeenskappe se hoofbron van voedsel bly styg weens skade aan toerusting en die ontoeganklikheid van paaie.
“Die padnetwerk is kardinaal om die hele voedselproduksieketting doeltreffend te laat werk en te sorg dat eindverbruikers bekostigbare voedsel op hul tafels het. Die bydraes deur vennote soos NWK en Agri NW sal help om uitgawes vir die produsent en uiteindelik die eindverbruiker laer te hou,” het Theo vervolg.
“Dit sal boonop ook ander padgebruikers, wat met busse en taxi’s op hierdie paaie na hul werksplekke en skole moet reis, bevoordeel. Baie vragmotors gebruik ook hierdie paaie om graan na die onderskeie verwerkingsaanlegte te vervoer.”
Verskeie produsente het hulle dank teenoor NWK uitgespreek vir die inisiatief.
Ander paaie in Noordwes sal in komende fases van die projek geprioritiseer word. NWK skenk ook gereeld teer om slaggate in Lichtenburg se sentrale sakegebied te herstel.
