TLU SA neem kennis van president Cyril Ramaphosa se aankondiging van ’n kommissie van ondersoek na grootskaalse korrupsie en politieke inmenging in die Suid-Afrikaanse regsdienste. Hierdie poging om die veiligheids- en vervolgingstrukture in al hul fasette te suiwer, is op papier ’n belangrike stap, maar die vraag is of dit nie dertig jaar te laat kom nie.
“Vir te lank leef ons land in die werklikheid van ’n stelsel wat faal, ’n polisie- en regstelsel wat nie beskerm, nie ondersoek en nie vervolg nie,” sê Bennie van Zyl, hoofbestuurder van TLU SA. “Hoewel boere en hulle werkers besonder swaar dra aan hierdie verval, is dit alle Suid-Afrikaners wat die prys betaal. Die publiek se wantroue in die stelsel het só gegroei dat mense toenemend die reg in eie hande neem, want SAPD kan eenvoudig nie meer vertrou word nie. Is dit die uiteinde van dekades se kaderontplooiing?”
TLU SA verwelkom die besluit om polisieminister Senzo Mchunu, met onmiddellike effek te skors, maar beklemtoon dat simboliese skuiwe nie genoeg is nie. Die werklike toets sal wees of die kommissie daarin slaag om die werklike oorsake van verval bloot te lê, en of regtig opgetree word teen dié wat hul posisies misbruik het.
TLU SA glo en hoop dat hierdie kommissie ’n keerpunt kan wees, nie net nog ’n politieke rookskerm wat die werklike skuldiges beskerm nie. “Ons regstelsel kos die belastingbetaler miljoene, en tog is daar min geregtigheid. Ons vertrou dat hierdie kommissie uiteindelik die onreg uit die stelsel sal wegsny, sodat ons weer ’n funksionele en geloofwaardige regstelsel kan hê,” sê Van Zyl.
