Die uniekheid van landbou het ons klimatologies die laaste tyd weer erg getref. Ons het net weereens besef uit watter uiteenlopende omstandighede boere moet planne maak om steeds produktief en winsgewend te wees.
Ons is deur erge droogte met intense hitte en daarmee saam beurtkrag wat ook sy eie unieke impak het deur produktiwiteit en effektiwiteit te kortwiek. Toe kom die intense reën wat in baie gevalle erge vloedskade veroorsaak het aan infrastruktuur, gewasse en toerusting. Soveel so dat sewe van die land se nege provinsies as rampgebiede verklaar is. Dít wys net weer opnuut wat die uitdagings is wat ’n boer elke dag die hoof moet bied.
Dit is belangrik om te besef dat ons boere se uitdagings nie eenvoudig nie, dit is groot en daarom het ons die grootste waardering vir dit wat boere vermag deur steeds in produksie te bly. Landbou bly die basis van stabiliteit in Suid-Afrika. En rolspelers moet dit verstaan en die nodige ondersteuning bied, maar as dit nie gaan gebeur nie beweeg ons op gevaarlike terrein.
’n Voorbeeld hiervan is dat ons nou met die ramptoestand nie opgetel het dat gesamentlike operasionele sentrums (GOS) gestig is nie. Dié sentrums sou beteken dat rolspelers soos die staatsdepartemente, die weermag, die SAPD maar ook die privaatsektor soos georganiseerde landbou en rampbestuur bymekaar kom ten einde die uitdagings te help oorbrug en seker te maak dat die volle omvang van vloedskade geëvalueer word. Dit is nodig om te kyk wat gedoen kan word met die beskikbare kapasiteit om dit op te los.
Dit beteken ook dat daar daaglikse media kommunikasie moet wees om die rolspelers en publiek in te lig. Ongelukkig vind dit nie plaas nie en nou is ons op onsself aangewese. Boere neem noodgedwonge sake in eie hande deur paaie reg te maak en brûe te stabiliseer om produkte van die plaas na die mark te kry.
Dit is die realiteit.
Dit bly ’n groot en belangrike verantwoordelikheid om die staat te herinner aan sy verantwoordelikhede en druk op hom te plaas om dit na te kom. Ramptoestand of nie…dit bly die staat se verantwoordelikheid om na sy inwoners om te sien.
Foto Dan Meyers | Unsplash
