Klousule nr. 5: Ek vereenselwig my met TLU SA se standpunt dat die toepassing van vrye mark beginsels met minimum staatsinmenging in die ekonomie, en gewaarborgde privaatbesitreg, die hoeksteen vorm van groei. Dit bied die enigste volhoubare kans vir werkskepping, armoedeverligting en vooruitgang vir Suid-Afrika.
Suid-Afrika is besig om te degenereer in vele opsigte. Stelsels op alle vlakke knars tot stilstand en is daar haas geen terrein waar die probleme nie meer is as die suksesse nie. Juis dit bring ’n groot verantwoordelikheid vir ons elkeen na vore. Die strewe soos uitgespreek word, maar ook in die praktyk ervaar met wetgewing van gesentraliseerde beheer se resultate is armoede en baie hartseer. Dit verg van ons elkeen om ons stemme te laat hoor vir die regte beginsels. Die grondslag om ekonomiese groei te bewerkstellig is buiten privaatbesitreg en ’n mark gerigte ekonomie ook ’n verskeidenheid van ander aspekte en moet ons hard baklei om dit te behou.
Klousule nr. 6: Ek is trots op die unieke identiteit, afkoms en historiese grondslag van TLU SA en sal my beywer om die waardes wat die organisasie gevorm het te respekteer en te beskerm. Ek sal ook ander landbou-organisasies se identiteit respekteer.
Kultuur is ’n lewendige proses wat deur handelinge van daardie kultuurgroepering daagliks geslyp en gevorm word. Ons voorgangers het ’n trotse TLU SA met waardes waarop ons trots is vir ons oorgegee. Ons geslag het die verantwoordelikheid om vir die volgende geslagte ook ’n steeds geankerde in beginsels maar toekomsgerigte organisasie na te laat. Elke lid se deelname is kultuurvormend en moet ons deurlopend die vraag teenoor onsself antwoord oor wat is my nalatenskap? Vanuit ’n hegte struktuur wat positief bou vir die toekoms en daar geen twyfel bestaan oor identiteit nie is dit ook maklik om ander te respekteer vir wat vir hulle kosbaar is.
