Klik hier en maak 'n bydrae tot die TLU SA Traumafonds
Maak 'n bydrae tot TLU SA Traumafonds: Klik hier
Ons jeug – ons toekoms Dinsdag | 26 Oktober | 2021

Die geskiedenis leerplan gaan opnuut aangepas en in 2024 geïmplementeer te word. Die afgelope aantal jare se belewenis van hoe die geskiedenis verdraai, kern belangrike elemente uitgelos en selfs met leuens voorgehou word kan ons dan nie anders as om bekommerd te wees oor hoe die jeug in die toekoms gerig gaan word vanuit “ons” geskiedenis nie.

Wyle President Paul Kruger het gesê dat ons uit die verlede moet neem wat goed is en die toekoms daarmee moet bou. Die trotse ontwikkeling van die geskiedenis deur die eeue hier in Suider-Afrika was geskep deur veranderde toekomsgerigte voorgeslagte wat ’n soliede geloofsbegronding gehad het. Nooit was daar enige twyfel aan hul geloof in God Drie-enig soos geopenbaar in Sy Woord, die Bybel.

Die ANC is besig om kinders se denke in die skole van ons te steel deur aan hul verwronge sieninge oor te dra wat hul al hoe meer vervreem van daardie waardes wat deur die eeue ontwikkel is om aan ons ’n onderskeidende identiteit te gee. Veel gewag word gemaak van die sogenaamde reënboognasie wat egter soveel botsende lewens- en wêreldbeskouinge bevat dat dit net logies is dat dit nie volhoubaar kan voortbestaan nie.

As ouers en grootouers het ons in hierdie dae ’n groot verantwoordelikheid om ons jeug te anker in ons eie trotse geskiedenis. Kom ons gee deur ons voorbeeld en ons uitspraak vir diegene wat na ons kom ook iets waarop hulle trots kan wees.

Laat ons opnuut saam met Dr DF Malan wat tydens die inwyding van die Voortrekkermonument op 16 Desember 1949 die sielsondersoekende vraag gevra het: “Afrikaner, Quo Vadis, waar gaan jy heen?”

Laat ons ’n oomblik stilstaan by die vraag en dan ook na sy antwoord terugkeer naamlik: “Staan dan stil en draai terug. Terug na u volk. Terug na u volk se hoogste ideale, terug na die pand wat aan u toevertrou is om te bewaar, terug na die volksaltaar waarop u offers moet lê, en as dit van u vereis word, ook uself as offerhande. Terug na die heiligheid en onskendbaarheid van die gesinslewe.  Terug na u Christelike wandel,  Terug na u Christelike geloof. Terug na u kerk. Terug na u God!”

 

Foto: AthenaPexels