Eerlikheid oor ons werklikheid.
Suid-Afrika is tans nie op ʼn goeie plek nie en ons landbou-industrie gaan onder die bestuur van die nasionale regering daaronder lei. Enige persoon wat eerlik met hom- of haarself is, besef dit. Oor ‘n lang tydperk is ons gekondisioneer om te leer hoe om mislukkings te “bestuur” en in baie gevalle het dit wat verkeerd is, al die norm geword en het die strewe na uitnemendheid in die niet verdwyn om plek te maak vir gelykmatigheid om die falende stelsels en sisteme te probeer versag.
Ons toekoms moet nie bepaal word deur diegene wat afbreek en vernietig nie, maar deur hulle wat sterk fokus op ekonomiese groei en die bou van ons toekoms. Ons moet teen die aanvaarding van hierdie situasies waak. TLU SA het deurlopend gewaak teen die aantasting van ons integriteit deur onaanvaarbare praktyke te verwerp. Dit is ons verantwoordelikheid om toe te sien dat ons toekoms gebou word deur diegene wat daarop fokus om positief te bou en te skep.
Sedert 1897 het TLU SA opgestaan vir die familieboer om te verseker dat daar binne ons gevestigde strukture, wat ons krag op die grondvlak demonstreer, die verskil gemaak kan word om landbou te laat leef. Hier kom eerlikheid ter sprake. TLU SA het deur al die jare op die beginsels wat nodig is om landbou te laat voortbestaan gefokus en dit omarm.
Landbou is ʼn ekonomiese proses waar die laaste woord altyd deur die markkragte gespreek moet word. Dit is uiters kortsigtig om enige ideologiese of politieke uitspraak blindelings te aanvaar sonder om dit teen die markte te toets. Indien dit duidelik is dat die markte dit verwerp, moet ons eerlik en verantwoordelik wees en herbesin. Volgens TLU SA se oordeel is daar eenvoudig te veel ondersteuning vir regulasies wat reeds bewys het dat dit faal. Dit sluit die hele transformasie-agenda in, wat kaderontplooiing, korrupsie, SEB en onwettige wanbesteding en selfverryking insluit.
Suid-Afrika het weer vertroue nodig in ons stelsels, maar dit moet realistiese vertroue wees, gebaseer op waardes wat sinvolle en praktiese uitkomste lewer en ekonomiese groei bevorder. In daardie gees moet ons die toekoms optimisties, in ooreenstemming met ons kultuuropdrag en talente volledig benut en benader. Wanneer ons reg doen, is dit ʼn positiewe proses waar ons streef na verbetering, nie net as individue nie, maar ook as organisasies wat ʼn gevoel van trots oor wat ons verteenwoordig, teweegbring. Vandag is daar dankbaarheid teenoor TLU SA, wat voortdurend die stem van redelikheid en eerlikheid was en sal bly.
Ons vra dat julle, saam met TLU SA, altyd eerlik sal wees oor die werklikheid van Suid-Afrika. Dit is ‘n goeie beginpunt om oplossings vir die verskeidenheid onaanvaarbare probleme in Suid-Afrika te vind. TLU SA kies om positiewe uitkomste te bevorder – help ons om dit in belang van elke inwoner van die land te bereik.
Groete
Henry
Foto: Karolina Grabowska
