Na die verdoemende oudit verslae van die Ouditeur-generaal op die stand van munisipaliteite ondervind die inwoner van die land dat daar in werklikheid ’n algehele verval van die omgewing om ons is.
Die nuwe raad na die verkiesing het weinig beter gevaar en is dit duidelik in die omstandighede wat ervaar word. Met reg kan ons vra: Wat nou? Wat staan die belastingbetaler nou te doen? Die weerhouding van eiendomsbelasting is nie die gewenste opsie nie en moet altyd as die laaste en enigste uitweg gesien word indien alle ander opsies reeds benut is. Binne die munisipaliteit-grense is optogte en betogings aan die orde van die dag. Bande word gebrand op paaie, toegangspaaie word versper, besighede en inwoners word benadeel en die polisiediens kyk toe hoe hierdie misdadigers algehele chaos veroorsaak. Die swak prestering van die munisipaliteit voorsien redes vir hierdie chaos wrekende massas waar politieke agendas verskuil word in klagtes wat nie water dra nie.
Om aandag te gee aan kwessies wat die moontlikheid van ongelukkigheid kan veroorsaak, kan daar voorsiening getref word dat die minimale ongelukkigheid nie opgeblaas word in enorme aksies nie. Die probleem in elke munisipaliteit moet geïdentifiseer word. Elke munisipaliteit is ’n entiteit op sy eie en het definitief ook sy eie probleme soos wat daar tekortkominge is binne die raad en moontlik die afwesigheid van hulpbronne. So sal elke munisipaliteit se probleme van gebied tot gebied verskil. Sakeliga het ’n litigasie proses begin vir die gedetailleerde verslae van munisipaliteite wat in stres verkeer. Wanneer ’n munisipaliteit in stres verkeer, is daar ook nie die nodige hulpbronne wat daargestel kan word om die nodige dienste te lewer nie. Hierdie verslae is van uiterste belang om te bepaal wat is die stand van die probleem binne die munisipaliteit en hoe kan dit reggestel word. Daar is 154 munisipaliteite wat deel uitmaak van hierdie probleem veral op dienslewering en finansiële administrasie.
Die publiek moet in gesprek tree met die munisipaliteit in die vorm van belastingbetalers, georganiseerde landbou of besigheidskamers. Die kollektiewe aksie is van uiterste belang aangesien die verskillende verteenwoordigende liggame almal ’n belang het by die sake van die munisipaliteit. Die alledaagse probleme op grondvlak moet bespreek word en die munisipale bestuurder moet verantwoording doen om regstelling te laat geskied. Dit is tog immers waarvoor eiendomsbelasting betaal word. Die publiek se stem moet gehoor word in die sake van die munisipaliteit aangesien openbare deelname ’n verpligting is nie net deur die munisipaliteit nie, maar elke inwoner moet sy stem laat hoor. Die munisipaliteit moet op terme geplaas word vir regstelling en opvolg gesprekke moet geskied. Die proses is noodsaaklik om die korrekte werkswyse daar te stel indien die publiek by afwesigheid van die aksies van die munisipaliteit die saak verder wil neem.
Die toekoms is duister. Die lig aan die einde van die tonnel word versper deur kader ontplooiing, wanadministrasie, swak werkverrigting, korrupsie, diefstal, onvermoë en ’n gebrek aan verantwoordelikheid. As die publiek nie sy stem laat hoor nie, is die afwesigheid daarvan ‘n goedkeuring vir die voortsetting van ‘n onvoldoende, ontoereikende, afwesige munisipale struktuur wat slegs die goudpot van die belastingbetaler vir eie gewin benut.
Foto: Kyle-Philip Coulson | Unsplash
