Al te dikwels het SARS die vermoë om ’n lieflike dag sommer net goor te maak en dit nogal in ’n oogwink. Jy sal opstaan met ’n lied in jou hart. Jou oggendkoffie is sommer ekstra lekker. Buitekant is daar ’n stoomwolkie terwyl jy doelgerig oor jou grond stap. Die son kruip uit in ’n vriendelike rooi. Voëls word wakker en fluit. ’n Lieflike winteroggend. Ryp kraak onder jou skoene. Jou harde werk, jou hartland, jou trots…jy is gegrond.
Dan ping jou foon met die boodskap wat terselfdertyd vrees en ongekende woede in jou wakker maak. Daardie BTW-terugbetaling wat jy so broodnodig het – daardie einste betaling waarvoor jy al so lank wag – gaan nie gebeur nie. Met hierdie vyf woorde is hierdie hoop vernietig: “Burden of proof not discharged”
Dis te verwagte dat ’n mens verward sal wees. Wat op aarde?! Watter “burden” behalwe dat jy alreeds belasting betaal is hier ter sake? En wat is “discharge”?
Die kil en kliniese antwoord hier is: SARS is van mening dat jy nie voldoende bewys het dat jou BTW terugbetaal moet word nie. Daarom gaan hy nie terugbetaal nie. Daardie swaarverdiende geld waarmee jy BTW betaal het vir jou plaas se aankope. Daardie einste aankope waarmee jy moet boer en poog om kos te voorsien aan die menigte, daardie geld gaan jy nou nie kry nie. Jy gaan daarvoor ’n geveg moet op sit.
Artikel 96 meld duidelik dat die belastingbetaler moet presies sy aanslag kan verstaan. Dit moet duidelik wees:
- Wat is besluit,
- Wanneer is dit besluit,
- Wie het so besluit, asook
- Die regsredes waarom daar so besluit is.
Dis baie belangrik om te onthou dat SARS ’n betaal nou, stry later-beleid het. Regter Binns-Ward het in die Capstone 556 (en Kluh) versus SARS hofsaak beslis dat dit in die beste belang van die publiek van Suid-Afrika is dat SARS volle en spoedige betaling van belasting kry. Die probleem ontstaan nou wanneer jy as belastingbetaler ’n volle en spoedige terugbetaling van SARS verwag. Meestal wag jy.
Die groter probleem is egter wanneer SARS na ’n oudit besluit dat jy skuld meer as wat jy reeds betaal het. Dis dan wat SARS met gretige oë na jou bankrekening begin loer. Gaan lees gerus die vorige Pitkos-uitgawe se artikel: SARS – ongelyke speelveld.
Wanneer die woorde SARS en geld in die selfde sin gebruik word, moet jy bitter vinnig optree. Funksies tot jou beskikking op die E-filing webtuiste is die
- “Request for reasons” en
- “Notice of objection”
Dis baie belangrik om ook onmiddellik aansoek te doen vir ’n “Suspension of payment”. Dis nie voldoende om net beswaar aan te teken nie. SARS kan steeds jou bank opdrag gee om die geld bloot uit jou rekening te neem en aan hom oor te betaal.
Hierdie besware kan opeindig in hoogs tegniese punte. Derhalwe sal ek aanbeveel dat jy dadelik jou belastingpraktisyn inlig hiervan. Die praktisyn sal dan die nodige stappe neem. Indien jy nie ’n belastingpraktisyn het wat in jou beste belang kan optree nie, is jy welkom om ons te skakel. Ons is gerieflik geleë in die TLU SA se kantore in Silverton.
Opgestel deur Marica Gerber van Camira Geregistreerde Rekenmeesters en Ouditeure, TLU SA-gebou, Silverton, tel: 0861115227
Hierdie artikel is opgestel volgens inligting aan ons beskikbaar en ons eie ervaring. Dit verteenwoordig nie die standpunt van SARS of enige iemand anders nie.
