TLU SA het op 10 September sy jaarlikse kongres by die WNNR Internasionale Konferensiesentrum in Pretoria aangebied onder die tema “Plaaslike Krag = Globale Geleentheid.” Lede van regoor die land, verteenwoordigers van ander landbou-organisasies en die regering het saamgekom om uitdagings en geleenthede in die landboubedryf te bespreek.
Henry Geldenhuys is herverkies as President en Wannie Scribante as Adjunk-president. Die kongres het belangrike besluite oor eiendomsreg, veiligheid, arbeid, onderwys en omgewingsake aanvaar om TLU SA se beleidsrigting vir die komende jaar te bepaal.
Verskeie gassprekers het insette gelewer, insluitend hoofspreker Dr. Wouter Basson. ‘n Boodskap namens landbouminister John Steenhuisen is deur adjunk-direkteur-generaal Dipepeneneng Serage gelewer.
In sy presidentsrede het Henry Geldenhuys sy kommer gelug oor die onsekerhede wat boere in die gesig staar. Hy het gevra hoe lank dit sal wees voordat boere onteiening sonder vergoeding op hul plase gaan ervaar deur eiendomsreg aan bewoners en werkers te moet gee. “Die onsekerheid wat onteiening sonder vergoeding skep, is net té groot om beleggingsvertroue te vestig,” het hy gesê.
Geldenhuys het ook die uitdagings van klimaatsveranderlikheid, stygende misdaad en onvoldoende staatsondersteuning uitgelig. Hy het beklemtoon dat boere die ruggraat van die land se voedselsekerheid bly, maar waarsku dat selfs die sterkste boer sal sukkel om volhoubaar te bly sonder ‘n ondersteunende omgewing. Die president het ook melding gemaak van TLU SA se werk aan ‘n koöperasiemodel om aan boere weer beheer te gee oor insetkoste en die bemarking van hul produkte.
Bennie van Zyl, hoofbestuurder van TLU SA, het die harde werk van lede en strukture beklemtoon en die belangrikheid van langtermyn volhoubaarheid in landbou uitgelig. Die dag is afgesluit met toekennings aan uitstaande lede en ‘n oproep tot eenheid en samewerking onder boere.
