Die langverwagte landelike veiligheidstrategie-spitsberaad onder leiding van die SAPD en die minister van polisie, wat hoofsaaklik oor die Landelike Veiligheidstrategie se hersiening en implimentering gegaan het, het van 27-28 Junie in die Vrystaat plaasgevind.
Dit is onder andere deur die President van TLU SA, Henry Geldenhuys, Gawie Lotter (Bestuurder: Dienste) en Drickus Botha (Streekbestuurder: Noord) bygewoon. Henry het die geleentheid gehad om die kongresgangers en die minister toe te spreek oor die huidige stand van die Veiligheidstrategie en dat dit nie tot op grondvlak toegepas en geïmplementeer word nie, hoewel dit reeds teen einde 2018 goedgekeur en afgeteken is.
Na afloop van verrigtinge, het die minister aangekondig dat hy ’n ministeriële taakspan saamstel om die strategie te herevalueer en ’n gedetailleerde plan voor te lê oor hoe die plan nasionaal bemark moet word en hoe implimentering tot op grondvlak sal plaasvind. Die taakspan bestaan uit verteenwoordigers – 20 lede – van alle belange partye ten opsigte van landelike veiligheid. Gawie Lotter is tot die groep toegevoeg en sal sorg dat die belange van TLU SA en sy lede deurgevoer word.
Die taakgroep is reeds sedert 4 Julie 2022 in sitting en werksaamhede verloop na wense.
Die minister van polisie beoog om spoedig die taakspan tydens ’n mediakonferensie bekend te stel. Die minister beoog ook om die finale plan aan die kabinet voor te lê vir goedkeuring en daarstel van ’n kabinetsmemorandum om dit so spoedig moontlik uit te voer en te implementeer.
Foto: CLARA METIVIER BEUKES | Unsplash
