Die Minister van Landbou, Thoko Didiza se begroting vir die volgende jaar fokus weereens baie meer, verkeerdelik, op die ontwikkeling van bestaansboere, eerder as op die ondersteuning van kommersiële boere. Dit is nie bestaansboere wat kos op die tafel van die meerderheid Suid-Afrikaners plaas nie, maar kommersiële boere.
Hoewel die minister meen dat hierdie begroting die departement en bedryf sal toelaat om “voort te gaan om in die voedselsekerheid behoeftes van die land te voorsien”, noem sy ook dat slegs 9% van die landbou-uitsette deur opkomende boere geproduseer word. Nêrens in haar rede het sy verwys na hoe kommersiële boere, wat al jare en generasies lank kos produseer, suksesvol bygestaan word nie.
“Dit is bitter moeilik vir kommersiële boere om positief te bly wanneer die staat min belangstelling het om hulle by te staan, en die meganismes soos Onderstepoort wat hulle na bewering moet ondersteun nie eers daarin slaag om entstowwe vir skape en perde beskikbaar te hê nie,” sê Bennie van Zyl hoofbestuurder van TLU SA.
TLU SA verstaan dat daar belê moet word in die ontwikkeling van nuwe boere om in die aanvraag na voedsel te voorsien en het inderdaad jare gelede reeds aangebied om kennis en ervaring hieroor te deel, maar dit moet nie ten koste van die boere wees wat dit reeds onder baie moeilike omstandighede doen nie.
Die belegging wat gemaak word om opkomende boere te ondersteun, regverdig nie die uitvoere wat hulle bereik nie. Die departement het bv. die afgelope jaar R50 miljoen spandeer om 124 sitrusboere te ontwikkel. Hulle voer maar slegs ses miljoen van die 128-miljoen bokse sitrusvrugte uit.
Dit sal baie meer vir die ontwikkeling en volhoubaarheid van landbou beteken as die regering eerder fokus op bystand van kommersieel winsgewende boere as “ekonomiese herstrukturering”.
“‘n Begroting van R17-miljard strek net so ver. Wanneer die grootste gedeelte verkeerd belê word, plaas dit voedselsekerheid in die weegskaal,” sê Van Zyl. “Aangesien die beleid rondom landbou ook verkeerd is, is dit vanselfsprekend dat die begroting verkeerd spandeer sal word. Ons doen ‘n ernstige beroep op die regering om weg te beweeg van die idee van die sogenaamde ekonomiese herstrukturering- en herwinningsbeleid en eerder aandag te gee aan markkragte wat die winsgewendheid van kommersiële boere – en inderdaad die beskibaarheid van voedsel – bepaal.”
Om kommersiële boere in Suid-Afrika te ondersteun, of as boer ondersteun te word, sluit gerus hier by TLU SA aan.
