TLU SA Noord Kaap spreek sy ernstige kommer uit oor die beplande opgradering en moontlike uitbreiding van die Vaalputs kernafval stoor-fasiliteit, wat in ’n sensitiewe en strategies belangrike landbougebied geleë is.
Hierdie ontwikkeling het verreikende implikasies vir georganiseerde landbou, plaaslike gemeenskappe, en voedselveiligheid in Namakwaland en die breër Noord Kaap.
Ons bekommernisse sluit in:
1. Voedselveiligheid en volhoubare produksie:
Die Vaalputs-gebied lê in ’n streek wat toenemend belangrik raak vir volhoubare veeteelt en droëland produksie. Enige besoedeling, aktueel of potensieel, van grond, lug of waterbronne kan ’n direkte bedreiging inhou vir die veiligheid en markaanvaarding van voedselprodukte vanaf hierdie streek.
2. Omgewingsimpak op ekologies sensitiewe gebiede:
Namakwaland is ’n unieke ekostelsel en ’n toeriste trekpleister met hoë biodiversiteit. ’n Uitbreiding van die fasiliteit verhoog die risiko van langdurige omgewingskade – iets wat nie maklik omgekeer kan word nie.
3. Gebrek aan deursigtigheid en openbare deelname:
Ons is besorg oor die vlak van insluiting van plaaslike belanghebbendes in die besluitnemingsprosesse. Grondeienaars, landbouverenigings en gemeenskappe moet behoorlik geraadpleeg word, met duidelike insae in risiko-evaluasies, beplannings dokumente en alternatiewe opsies.
4. Negatiewe impak op plaaslike ontwikkeling en belegging:
Die teenwoordigheid van ’n kernafvalfasiliteit kan toekomstige landbou-ontwikkeling, toerismebeleggings en grondwaardes negatief beïnvloed, wat werkverskaffing en ekonomiese groei in die streek kan kniehalter.
TLU SA Noord-Kaap versoek die owerhede en verantwoordelike instansies om die proses te heroorweeg, deeglike onafhanklike omgewingsimpakstudies bekend te maak, en ’n betekenisvolle openbare deelnameproses te verseker.
Ons sal nie toekyk hoe die langtermyn volhoubaarheid van landbou en gemeenskappe in gevaar gestel word nie. Vaalputs mag nie ’n stil kompromie word wat die toekoms van Namakwaland onherroeplik skaad nie.
